Miya aur biwi ke darmiyan mohabbat, izzat, aur ek dusre ka khayal rakhna Islam mein buhat aham hai. Allah Ta'ala ne Quran-e-Majeed mein irshad farmaya:
**"Aur unke saath bhale tareeqe se guzar karo."** (Surah An-Nisa, 4:19)
Yani, apne biwi ya shohar ke sath achi zindagi guzarni chahiye, unke huqooq ka khayal rakhna chahiye, aur unhein ignore nahi karna chahiye. Nabi-e-Kareem ﷺ ne bhi farmaya:
**"Tum mein se behtareen woh hai jo apne ghar walon ke liye behtareen hai, aur mein tum mein se apne ghar walon ke liye sab se behtareen hoon."** (Tirmidhi)
Ek waqiya hai ki Hazrat Muhammad ﷺ apni azwaj-e-mutahharat ke saath waqt guzaar karte, unhein sunnte, unke saath muskurate aur unke huqooq ka buhat khayal rakhte. Hazrat Aisha (RA) se riwayat hai ke Rasoolullah ﷺ ghar ke kaamon mein madad karte, jese ke apne kapre khud seewna, jootay marammat karna, aur doosre kaam jo ghar ke andar hote.
Yeh sab batate hain ke shohar aur biwi ka rishta mohabbat, izzat aur ek doosre ki qadr aur ahmiyat ko samajhne par mabni hai. Unhein ek dusre ko ignore nahi karna chahiye, balke samajh, tawajjo aur muhabbat se ek dusre ke saath zindagi guzarni chahiye.
Islam mein miya-biwi ke beech mohabbat aur ek dusre ka khayal rakhna sirf unka huqooq nahi, balke ek ibadat hai. Shohar aur biwi ke darmiyan talaaq ya alag hone ki sab se badi wajah aksar ek dusre ko ignore karna ya ghair zaroori taur par shikayat karna hoti hai. Is liye, Islam hamesha is baat par zor deta hai ke apas mein mohabbat aur samajhdari se raho.
**Quran-e-Pak** mein bhi irshad hota hai:
**"Aur unke huqooq (shohron par) isi tarah hain jis tarah (shohron ke) huqooq unpar hain, ma'roof tareeqe par."** (Surah Al-Baqarah, 2:228)
Is ayat se wazeh hota hai ke jo izzat aur muhabbat miya apni biwi se chahta hai, usi tarah biwi bhi apne shohar se chahti hai. Shohar ko chahiye ke woh biwi ki jazbaat ka khayal rakhe, uske ahsaasat ko samjhe, aur usko mohabbat de.
**Waqiya Hazrat Umar (RA) ka:**
Ek martaba Hazrat Umar (RA) ke daur mein ek mard unke paas aaya aur shikayat ki ke uski biwi uski baat nahi sunti aur usko ignore karti hai. Jab woh apni baat lekar Hazrat Umar (RA) ke darwaze par pohanch gaya, toh usne suna ke Hazrat Umar (RA) ki biwi unse buland awaaz mein baat kar rahi thi. Yeh dekh kar woh mard waapis mud gaya. Hazrat Umar (RA) ne usko bulaya aur poocha ke woh kyun aaya tha? Us mard ne kaha ke woh apni biwi ki shikayat karne aaya tha, lekin aapke ghar ka manzar dekh kar sharminda ho gaya.
Hazrat Umar (RA) ne farmaya, **"Woh meri biwi hai, mere kapre dhoti hai, mere khane ka intizam karti hai, meri aulaad ki tarbiyat karti hai. Kya main is qadar bhi bardasht nahi kar sakta?"** Yeh jawab sun kar woh mard samajh gaya ke shohron ko bhi apne biwiyon ki choti-moti ghaltiyan nazar andaz karni chahiye aur unhein mohabbat se samjhana chahiye.
Is waqiya se sabq milta hai ke miya biwi ko ek dusre ki ghair zaroori bato par naraaz hone ke bajaye, maafi dene aur samajhdari se pesh aana chahiye. Yeh amal sirf ek khushgawar zindagi ka sabab nahi banta, balke Allah ke nazdeek bhi pasandeeda hai.
0 Comments